ليش طوّل الاعتصام؟

لمّا تقرر يبتدي الإعتصام المفتوح كلنا كنا متمنيين تسقط الحكومة بسرعة، يعني انو ما تاخد المسالة أكتر من كام يوم بالكتير أسبوع. هيك كنا متمنيين، بس كنا كمان حاسين انو يمكن هالقصة تطول كتير، بس متل ما بتعرفو بهيدي المواقف بتكون الحماسة كبيرة لدرجة انو بيبطل الانسان يفكر بوضوح وبيعتبر انو كل شي حيصير بسرعة ومتل ما بدو.
بس لو فكرنا بشوية موضوعية وصراحة، منعرف ومنتأكد إنو القصة أكيد بدها وقت ويمكن مش بس شهر يمكن أكتر. السبب واضح، ببساطة لما نتذكر انو هيدي الحكومة في وراها أمريكا والحكومات العربية (المعتدلة) متل ما بتسميها أمريكا، وأخيراً وليس آخراً عم بتنال حكومتنا الدعم من الحكومة الصهيوينة بنفسها. ولما نتذكر إنو بسقوط هيدي الحكومة بتسقط آخر ورقة موجودة بإيد أمريكا بالمنطقة. لإنو أمريكا خسرت حربها على أرض لبنان ضد حزب الله والمقاومة، وهي غرقانة من زمان بفلسطين والعراق وأفغانستان. وإنو لما تسقط هيدي الحكومة رح يتدمر مشروع الشرق الأوسط الجديد بمفهوم كونداليزا رايس. وإنو لما تسقط الحكومة، ما حيبقى لحلفاء أمريكا وعملاءها بلبنان أي سلطة، وهيك ما حتقدر أريكا تمرر أي مشروع لا للبنان ولا للدول المحيطة... لما نتذكر كل هالنقط وغيرها منعرف إنو الحكومة ما حتسقط بسهولة ولا بوقت قصير وإنو أمريكا ما حتتخلى عن هالورقة اللي بتعتبرها رابحة. وإنو على القليلة الإعتصام ما حيجيب نتيجة سريعة أبداً وبالنهاية لازم خطوات أقوى وأقسى للحكومة تتاخد.
للأسف وصلنا لهالمرحلة...
للأسف إنو صرنا نضطر نوقف بوجه اخواتنا بالوطن لنمنع تنفيذ مشروع أمريكي صهيوني بالمنطقة وبلبنان.
للأسف إنو أمريكا حققت هدف كبير من سياستها وهو "فرق تسد"، وقدرت تعمل جبعتين بقلب بلد واحد، للأسف إنو قدرت أمريكا تمتلك موظفين ورجال الها بقلب وطننا تستعملهن وقت ما بدها.
للأسف كل هيدا عم بيصير...
بس المهم انو الحكومة حتسقط، هيدا شي أكيد. مهما أخدت وقت مش مهم، بس اللي متأكدين منو وواثقين إنو السيد حسن لما بيوعدنا بشي بينفذو ومتل ما وعدنا بالنصر وانتصرنا بالحرب، هو وعدنا بالتغيير وحتى لو مر وقت طويل فالتغيير كما النصر آت آت إن شاء الله...