قبل الغيبة

الى كل أصدقائي المدونين والذين يزورون مدونتي
أولا: أكيد لاحظتوا تغيير في المدونة والسبب يعود لأني انا حشرية كتير بحب العب باشيا ما بفهم فيها فاللي صار انها انتزعت وصار لازم اشتغل فيها مرة تانية

بس صراحة انا ابتديت ازهق منها ولاني انا بحب كل شي بعملو يكون مثالي فالمدونة عم تسببلي مشاكل وعم تضيعلي وقتي

فاللي بدي أعملو هو التالي
امتحاناتي صارت قريبة، وانا صراحة كتير متضايقة من حالي لأني عم ضيع وقت كتير على الانترنت من دون فائدة
والمشكلة اني حبيت عالم التدوين كتير وكل يوم بتعرف على مدونة أحلى من اللي قبل
فيا أصدقائي انا بحاجة لمساعدتكم حتى وقف شغل على المدونة طول الفترة الجاية والتفت بس لدراستي

انا عنجد ناوية ادرس بشكل جدي عشان انا محتاجة جيب علامات عالية

عشان هيك لو غبت فترة طويلة ما تستغربوا
وعلى طول ادعولي الله يقويني ادرس واجتهد في الدرس عشان جيب مجموع عالي

انا مش معودة ادرس من قبل
يعني تعودت جيب علامات عالية بالمدرسة من دون درس أوتعب
ولما فتت على الجامعة فكرت انو كمان بلا درس ممكن انجح واتفوق
بس تفاجأت بالحقيقة
المهم بعد ما قلتلكن قصة حياتي مع الدراسة
بتمنى منكم انكم على طول تدعولي
وانتو على طول في بالي

"كل الحق على "كريس

بما أننا نحن العرب نهوى فلسفة "إلقاء اللوم على الغير" و "التفلت من المسؤوليات"، ونسير ونعمل بهذه المبادئ في كل زوايا حياتنا.
أردت أنا "الفرد البسيط" في هذه "الأمة العربية العظمى" أن أجري مع التيار، وأتخذ من هذه المبادئ طريقاً لحياتي. ولأبرهن ولائي سأقوم بأول تجربة... عسى أنال اعجاب ورضى أصحاب الجلالة والعظمة...

...حين أشاهد ما تفعله أمريكا كل يوم في بلادنا ومنطقتنا من تفريق وفتن وقتل ومحاصرة... أو من شراء للضمائر وابتزاز ورشوة للزعامات والرؤساء الخ الخ... وحين أرى كيف أضحت أمريكا مملكة عظمى تسيطر على الكون وكأن كل ما تشرق عليه الشمس هو ملكها، وأن كل من ينبض قلبه بالحياة على هذه الأرض، ما هم إلا عبيد تحت أقدام امبراطورها "بوش الصغير"... عندما أشاهد وأعيش كل هذا، أرفض بكل قوة أن ألقي الحمل، لا سمح الله، على عاهل ملوكنا وحكامنا العظماء.. حاشا لله.. فهم قد قادوا شعوبهم وبلادهم في ثورات ضد الاستعمار وحرروها، لكنهم معذورون اذ أعجبتهم الكراسي "الجلد" التي يجلسون عليها وارتاحوا لدرجة أنهم رفضوا التخلي عنها... ولا ألقى الحمل حتى على الشعوب العربية الواعية النشيطة المطالبة لحقوقها الشرعية والطبيعية... لا لا لا
بل انني أردت أن أبحث عن السبب الرئيسي الكامن وراء هذا الظلم، علني أجد حلا جذرياً لهذه المشكلة. وبعد طول تفكير لمعت "اللمبة" في رأسي، وعرفت من يجب علينا أن نتهم ونحاسب...

إنه "كريس" سامحه الله..

"كريس" ألم تعرفوه؟!

"كريستوفر كولومبوس" هل هذا أفضل؟!!

نعم يا أصدقائي، فإنه لولا اكتشاف "كريس" لتلك "الأرض الجديدة" أو كما أحب أن أسميها "الجزيرة الملعونة"، لولا اكتشافه لها لما وصلنا إلى ما نحن عليه اليوم..

آه منك يا "كريس" أما كان بإمكانك أن تشيح بنظرك عن تلك الأرض؟ أما كان بإمكانك اعتبارها سراباً أو خيالاً أو وهماً ناتجاً عن التعب بعد رحلة حول العالم؟

تخيلوا معي يا أصدقائي لو لم يكن "كريس" قد اكتشف تلك الأرض...

آه ه ه ه... ما أجمل هذه الخيالات

لما كان الهنود الحمر طُردوا وقُتلوا وشردوا في محميات كأي فصيلة من فصائل الحيوان المهددة بالإنقراض.

ولما كان "السود" من أفريقيا أُخذوا عبيداً إلى هناك سنيناً طوال حتى قاموا بما قاموا به ليعترف بهم الشعب الأمريكي "كبشر" مثلهم، مع العلم أن التفرقة العنصرية لا تزال حتى اليوم..

ولما كان..
ولما كان..

لكن الأهم هو أنه لو لم يكتشف "كريس" تلك الأرض، لما كانت فلسطين اليوم سليبة الأمة، مغتصبة من قبل الملعونين على لسان الله ورسوله، ولما وصلنا الى يوم نرى فيه أقدس مقدساتنا ملعبا لقتلة الأنبياء والمرسلين..
ولما كانت العراق اليوم تعيش القتل المذهي والانفجارات اليومية والتمزيق والارهاب و و و...
ولما كان لبنان اليوم يتخبط في وحول الفتنة والحكومات الفاسدة...

ولما كانت الشعوب العربية تشتكي من الظلم والقمع والاضطهاد والاعتقال...

نعم يا أصدقائي، ليس للعرب أي جريمة أو يد فيما وصلنا اليه من انحطاط

إنه "كريس".. ذاك المجرم عديم الإنسانية
كل الحق عليه

وإنني يا أصدقائي أعلن من هذا المنبر وأطالب المجتمع الدولي، بصفتي "عربية قح"، أن يقوم بتشكيل "محكمة دولية"، ونحن العرب وخاصة اللبنانيون نحب ونعشق "المحاكم الدولية" ، للتحقيق فيما فعله المدعو "كريستوفر كولومبوس"، وأن تنفذ في حقه أقسى أنواع العقوبات....
هكذا نرتاح نحن العرب، ونكون قد حللنا كل مشاكلنا بشكل جذري ونهائي.

...ها أنا يا جلالات الملوك وفخامات الرؤساء و... ماذا أيضا؟ نسيت الألقاب من كثرتها... المهم أنني هكذا أعلن ولائي التام لأمتي العربية المتفتتة وأسأل منكم أن تقبلوني "كعربية أصيلة" بكل المواصفات المطلوبة أن تكون في كل فرد وانسان عربي يعيش على وجه الأرض...
وأطالبكم يا أخواني العرب أن تجمعوا كل ما عندنا من مصائب وويلات كي نلقيها كلها على كاهل "كريس" لعلنا نرتاح ونتخلص من كل مشاكلنا... وبلا ما نشتغل على تحسين حالنا.. لشو تعب القلب؟؟

شو هالإحراج؟!!!!

تعرفت هلأ على أول صعوبات انو يكون عندي مدونة... ليش؟ لانو في ابتكار جديد ابتكروه المدونين العباقرة هوي لعبة غريبة... أسئلة ولازم نجاوب عليها واللي مررلي التاج هوي صاحب مدونة مصر هي أمي "محمد"
فبحب قول لمحمد: شكرا على التدبيسة يا محمد وان شاء الله بردلك اياها بالأفراح
المهم رح ابتدي بأول "تاج" واللي هيي اسئلة عن اشياء شخصية
اية اللي حيحصل لايميلك لما تموت؟-

أنا بفكر بهالنقطة كتير، وبعتقد اني ممكن اكتب الباسوورد بوصيتي، وأطلب من أمي أو اختي أو أي حدا بيقراها انو يفوت على الايميل ويبعت رسالة لكل اللي بعرفهن، بركي بيدعولي وبيترحموا عليي. وعلى كل حال انا بعتمد على ذكاء الناس اللي بعرفهن فاذا حسوا انو غيبتي طولت لازم يحاولوا يعرفوا السبب وهنا يُعرف الأصدقاء.....ههه

بس لما موت شكرتي الهوتميل والياهو رح يحسوا بالفراغ العظيم اللي صار ورح يسكروا اكيد

اديت الباس وورد لحد قبل كده؟-

مرة ساعدت حدا يحزرها بعد ما سألني عنها كتير، بس بعدين غيرتها طبعا

لو اه كانت طبيعة علاقتك بيه اية؟-

كان هالحدا ماما.. اللي ما برتاح الا اذا قلتلها كل شي.. وهيي عادة بأسلوبها بتكشفني وبتقنعني احكي.. بالضبط متل يونس شلبي بمسرحية "العيال كبرت" ههه

اسمك؟-

زينب

اسم الدلع المشهور وسط اصحابك؟-

عندي كتير كل شخص تقريبا بعيطلي باسم عندي صديقة بتحب تسميني "زيزو".. بحب هالاسم

وصديقة تانية بتعيطلي "زينبوت".. أنا واياها بنحب مصر والمصريين فحبت تسميني باسم "فرعوني" وأنا بسميها "ودادوت"
أما ماما بتسميني زينوبة أو نوبة.. وكمان بحب هالاسم

بابا أوقات بيسميني زيزي.. ومع اني بكره اسم "زيزي" و "زوزو" بس من بابا بتطلع حلوة

بس صراحة أنا بفضل اسمي "زينب" بكل بساطة بدون اسم دلع

عمرك؟-

تسعة عشر سنة و3 أشهر

برجك؟-

العقرب

مجال دراستك؟-

بيولوجي (علوم طبيعية)

شخصيتك نوعها ايه؟-

همممم سؤال صعب شوي.

أنا بعتبر حالي طيبة القلب، بس بنفس الوقت بستفز كتير، وممكن خلي اللي قدامي يوصل لقمة الغضب

بحب كتير الناس والأصدقاء. بحب اقعد لحالي اتأمل بالدنيا، بس بنفس الوقت بكره الوحدة.

بعتبر حالي ذكية، بكل تواضع، وبنفس الوقت عندي أسئلة غبية.

لما بحب بحب بكل قوة، ولما بكره بكره كتير. فما تخلوني اكرهكن هههه.

بموت بالأطفال، وناطرة اليوم اللي بصير فيه أم، حكوجية درجة أولى، بس كمان بنزعج من كترة الحكي.... سريعة الغضب، وممكن أي واحد يستفزني بكل سهولة، خاصة بالسياسة.

بخاف كتير وبقلق على الناس اللي بحبهن، وممكن اذا أهلي اتأخروا شوي شغل التلفونات وبلش ابكي مع انو بكون السبب شوية عجقة سير. لو عندكن وقت ممكن ضل لبكرا عم بحكي

السفر بالنسبة لك؟

بحب السفر كتير، بس عمري ما فكرت هاجر واترك لبنان

المود بتاعك؟-

مودي غريب، ممكن كون بقمة السعادة والفرح، وفجأة حس انو هموم الدنيا على راسي وخلي كل اللي حواليي يكتئبوا لما يشوفوني مكتئبة ومبوزة.

وقت فراغك بتعمل فيه ايه؟-

ممكن أقرا، وقبل ما فوت عالجامعة كنت ارسم كتير، بس لما فتت صرت بدل ما ارسم شجرة وطبيعة حلوة.. صرت ارسم ضفادع مشرحة وحجار ونباتات على طريق الانقراض ههه أوقات بقعد ما بعمل شي، بس بفكر. اللي بيشوفني هيك بيفكر انو صرلي شي.. وطبعا أهم شي الكمبيوتر والانترنت ومدونتي

الاكلة المفضلة؟-

شو هالسؤال؟

كل الأكل طيب. بس أكتر شي بحب الأكل اللي فيه باتنجان، وبفضل الطبخ على الفاست فوودز..

الصفات اللي خدتها من بابا؟-

ما فكرت بهالشي من قبل... بس بعتقد أخدت من بابا طيبة قلبو وعفويتو وسرعة انفعالو. بابا بيستعمل العاطفة أكتر من العقل.

الصفات اللي خدتها من ماما؟-

كل اللي بيشوفوني بقولوا اني نسخة عن ماما. وانا بعتبر اني نسخة عنها بالشخصية أكتر من الشكل. تقريبا كل شي فيني أخدتو عن ماما. مع انو ماما بتعتبر هيدا شي مش صحي، باعتبار انها عم تدرس علم نفس، فبتحاول تخليني استقل عنها شوي شوي، ويكون الي شخصية خاصة... بشكل عام ما فيني اعزل شخصيتي عن ماما أو بابا، الاتنين عطوني اشيا موجودة فيهن هني الاتنين. متل مثلا حب الأطفال.. ماما وبابا بحبو الأولاد كتير، نحنا خمسة أولاد بالبيت، وكانوا بيتمنوا نكون أكتر ههههه

اكتر 6 حاجات بتكرهها؟-

- أمريكا واسرائيل وعملاءها وحلفاءها من زعماءنا وحكامنا العرب الأجلاء

العاملين على الفتنة بين المسلمين أو أبناء الوطن الواحد

التدخين واني شوف حدا عم بيرمي وسخ أو ورق على الشارع

الظلم والسلبطة

انو كون عم بشتغل على الانترنت وينقطع الاتصال أو الكهربا أو يخلص وقتي

الغباء والاصرار على الخطأ

اكتر 6 حاجات بتحبها؟-

مش رح قول "الله سبحانه وتعالى والرسول وأهل البيت عليهم الصلاة والسلام" لانو حبهم (أو عشقهم) ما بيتقارن بشي تاني

أهلي وأخواتي، بموت فيهن واصدقائي

عائلتي المستقبلية ان شاء الله

الشهداء ثم الشهداء ثم الشهداء والمجاهدين والسيد حسن نصر الله

بلدي لبنان وضيعتي بالخصوص "ميس الجبل"

مدونتي والانترنت

بحب شوف الشباب المؤمن

الشغل بالنسبة لك؟-

مهم كتير، خاصة لالي كطالبة. بس ما بحب المرأة تشتغل برة البيت. وان شاء الله أن مش ناوية اشتغل برة البيت، الا بحال الضرورة، عشان اتفضى لأولادي واعمل فيهن اللي على زوقي. الله يعينن عليي هههه بس الشغل شي كتير مهم لانو بيصقل الشخصية وبيزيل الكسل والتخاذل من كل المجتمع

ايه الكمبيوتر والانترنت بالنسبة لك؟-

شي مهم كتير. اتعودت عليه. بحب اكتشف فيه اشيا جديدة، وممكن اقعد على الكمبيوتر(حتى من دون انترنت) لأوقات طويلة وما ازهق

الخمس حاجات اللي ماحدش يعرفها عني هي ؟-

اني بغار كتير كتير. كنت حتى غار اذا شفت رفيقتي عم تحكي مع رفيقة تانية هههه. بس الحمدلله خلصت من هالشي-

انو ماما سمتني بتول لما خلقت، وكانت تخاطبني بهالاسم لفترة، بس بعدين بابا سجلني باسم زينب -

انو ممكن ضل عمر ما شوف رفقاتي بس بضل فكر فيهن على طول-

اني اتسجلت سنة اولى علم نفس بنفس الوقت مع كلية العلوم و ما كملت، بس ان شاء الله رح كمل-

اني فتت على المدرسة بعمر السنتين ونص تقريبا وكمان اني فتت روضة تانية مباشرة، مش روضة أولى... شفتو الذكاء هههه

خمس أشخاص تمررلهم التاج ده ؟-

هني مش خمسةن بس هول اللي بعرفهن :)
نائل- فؤادة
مارون- مارون الراس
جيمي- تخاريفي

جو- عقلي المتجمد الشمالي
أما التاج التاني فخليه لمرة تانية
اتفقنا

خلينا نحلل شوية سياسة

اليوم قررت نشتغل شوي متل شرلوك هولمز يعني نحقق ونفكر بشوية أدلة موجودة

فخلينا نسلسل الأفكار التالية مع بعض ونفكر فيها منيح

- تحرير جنوب لبنان في أيار سنة 2000

- نجاح المحافظين الجدد في الانتحابات الأمركية، ووصول جورج بوش

إلى رئاسة الجمهورية في الولايات المتحدة الأمريكية

- حادثة 11 أيلول/سبتمبر

- إعلان الادارة الأمريكية حربها على "الإرهاب" العالمي

- دخول القوات الأمريكية الى العراق بعد دخولها الى افغانستان

- صدور القرار 1559 القاضي بسحب سلاح "الميليشيات"، قاصدين المقاومة، واخراج القوات السورية من لبنان

- رفض الشهيد الرئيس رفيق الحريري اعتبار المقاومة ميليشيات وبالتالي رفضه لتنفيذ القرار الدولي

- اغتيال الرئيس الحريري وتعميم الفوضى في لبنان باغتيالات متتالية، واتهام النظام السوري بهذه الاغتيالات

- خروج القوات السورية من لبنان

- موت الرئيس الفلسطيني السابق ياسر عرفات، الذي كان متمسكا باللاجئين الفلسطينيين ومسألة القدس رغم ما كان يناله من اطراءات وجوائز سلام من قبل المجتمع الدولي، وتسلم محمود عباس السلطة من بعده والذي هو "أقل عناداً" و"أكثر مرونة" وقابلية للنقاش مع الصهاينة

- وحدثت المفاجأة الكبرى، فإن الديمقراطية التي أرادت أمريكا تطبيقها أتت بعدوها "قوى مقاومة إسلامية" أي حماس الى الحكم. وانقلب السحر على الساحر


- الحوار الوطني اللبناني، الذي هدف إلى سحب سلاح المقاومة بالسياسة، ولكن بعكس المرجو منه بدأ النقاس عن استراتيجية دفاعية تكون المقاومة عنصراً فعالاً فيها

- نشوب الحرب على لبنان والمقاومة في صيف 2006 من أجل سحب سلاح المقاومة بالقوة بعد فشل السياسة


- الدعم المستمر لحكومة المالكي في العراق، والسنيورة في لبنان، والسلطة برئاسة محود عباس في فلسطين

- تمرير السلاح للقوى المعارضة لحماس في فلسطين وتزايد قتل الفلسطينيين لبعضهم، وطبعا استمرار قتل العراقيين لبعضهم، وازدياد التوتر بين اللبنانيين


- ازياد الحديث عن الخطر الايراني في المنطقة، والتصديق العربي الكامل (واعذروني) بغباء لهذا الأمر، حتى غدت إيران بالنسبة لسلاطين وحكام العرب أكثر خطورة من اسرائيل نفسها، تلك الغدة السرطانية المزروعة في قلب الشرق الأوسط.

- المنطق الأمريكي الجديد الذي يمتلئ بمصطلحات "السنة" و"الشيعة" وذلك طبعا لأهداف نعرفها جميعا، وهو اتباع استراتيجية "فرّق تسُد" وللأسف الإنصياع العربي الساذج وراء هذه المصطلحات التافهة

وعلى هذه النقاط نستطيع ان نسأل بعض الأسئلة..
شغلو عقلكن منيح قبل ما تجاوبوا

1- لماذا قررت أمريكا، بعد اعتمادها الكامل على ربيبتها اسرائيل أن تدخل بنفسها الى الشرق الأوسط؟ هل هذا يعني أن امريكا أحست أن اسرائيل باتت ضعيفة وأن وجودها مهدد؟؟؟

2- من قتل الرئيس الشهيد رفيق الحريري؟ أو على الأقل من أردا لهذا أن يحدث؟ ومن أكبر المستفيدين؟ هل هي سوريا التي عانت في الفترة الأخيرة من المحاصرة والاتهامات والتحقيق الدولي...؟ أم أمريكا التي تعتبر كل مشكلة تحدث في المنطقة باًباً لتحقيق مبتغاها؟؟ وما رأيكم بآخر ما توصل له تقرير المحقق ميليس، وهو أن سوريا تعاونت مع التحقيق، بينما لم تتعاون دول اخرى مثل فرنسا وأمريكا ألا يعني هذا أي شيء؟؟؟

3- لماذا تلجأ أمريكا اليوم الى اسلوب الفتنة والتفريق المذهبي؟ وما هو دورنا في هذه الحالة؟ هل نستسلم لها ونطبق ما تريد (كما يحدث في فلسطين والعراق) أم نقف في وجهها ونحاول أن نتقارب اكثر وأكثر؟؟؟

ولا تنسوا ما يحصل اليوم في فلسطين الدامية، التي لا تدري ممن تشتكي، من عدوها الذي يغتصب ويدنس أقصاها المقدس؟ أم أبناءها الذين يقتتلون وينشغلون عن قتال الصهاينة... ساعد الله المسجد الأقصى والقدس الشريفة، فنعم مقدسات هي وبئس شعوب تحفظ هذه المقدسات!!!

لقطات مميزة

ما كنت مخططة انو يكون هيدا الوبست هيك

بس حبيت شارككن بتلات أفلام مميزة جبتن عن اليوتيوب

الأول هوي لقطة نادرة بتظهر مدى صدق اعلام قوى السلطة عندنا بلبنان

يمكن في منكن شافوه على المنار، هوي بيتعلق باللي صار يوم الخميس الأسود بجامعة بيروت العربية

اللي ما شافوه بنصحهن يشوفوه

شي كتيييير حلو

اكذب اكذب اكذب

أما هيدا ففيلم مؤلم شوي، بس لازم من فترة لفترة نتذكروا،

هوي مقطع عن مجزرة قانا اللي صارت بحرب تموزعلى لبنان

لا تناموا




هيدا مقطع أكيد كتير منكن شافوه وقت الحرب، صح ولا لأ

ولوو كتير مشهور

عنجد كان يوقفلنا شعر بدنا كل مرة كنا نشوفو

عباية السيد

عاشوراء... لماذا؟

من الأسئلة التي توجّه إلى الشيعة هي "لم تحيون عاشوراء في كل سنة بالحزن والبكاء والحسين عليه السلام استشهد من 1400 سنة تقريباً؟" لعل الجواب على هذه الأسئلة ظهر جلياً للأمة الإسلامية خلال الحرب على لبنان. ومع حرصي على عدم ربط وتقييد المقاومة في لبنان بالمقاومة الاسلامية في حزب الله والذي هو حزب مسلم شيعي، فإن الحديث عن هذا الموضوع مهم جداً. إن العقيدة التي يمتلكها المنتمون لحزب الله من شعب أو قيادات وبشكل خاص مجاهدين يعملون على الأرض ويرابطون في الثغور هي عقيدة مهمة جداً مرتبطة جداً بعاشوراء الإمام الحسين عليه السلام وملحمة كربلاء. فكل هؤلاء المجاهدين ينظرون إلى ما حصل في كربلاء على أنه درس يتعلمونه ويعلمونه الى أولادهم ومجتمعهم ويحاولون تطبيقه في كل جانب من حياتهم. وإن التضحية التي قام بها إمامهم في كربلاء جعلتهم يثقون بأن الموت لا يهم في سبيل اعلاء كلمة الحق وأن الدم ينتصر على السيف وكان ترجمة واضحة للآية الكريمة التي تقول أن الفئة القليلة يمكن لها أن تغلب الفئة الكثيرة بإذنه تعالى.
فلو نظرنا إلى حادثة كربلاء بعمق وإختصار في الوقت نفسه نرى أنها كانت للإسلام كله فثورة الإمام الحسين كانت قائمة ضد شخص وحكومة فاسدة أرادت تدمير صورة الاسلام المحمدي الأصيل وتحويله الى مملكة للباطل... وعندما طلب منه يزيد مبايعته وهدده بقتله ولو كان معلقاً على أستار الكعبة رد الإمام الحسين وهو سبط رسول الله صلى الله عليه وآله وهو أصدق رجال زمانه: "إن يزيد هذا رجل فاسق فاجر شارب للخمر قاتل للنفس المحترمة ومثلي لا يبايع نفسه.." وقد صدق الإمام فكيف لسبط الرسول وإبن علي والبتول وهو الذي يسري في عروقه دم النبوة الطاهر أن يبايع رجلاً قاتلاً للنفس المحترمة يملأ قصرة جوارٍ وقرود وطبول وزمامير؟ ولا يقيم من حدود الإسلام شيئاً؟ كيف له أن يرى الإسلام يختفي أمام عينيه؟ تصوروا لو ان الإمام بايع يزيد لكان الإسلام الذي وصل الينا غير الذي أراده الله تعالى ورسوله الكريم. أراد الإمام بثورته التي علم ان هناك من سيخونه فيها وأنه سيموت وحيداً بعد ان يستشهد أصحابه القلائل ورجال أهل بيته الأطهار، علم أنه سيكون وحيداً أمام جيش يزيد الضخم لكنه كان يجب أن يقوم بثورته حتى يوضح للعالم والأجيال القادمة ان حكومة يزيد ولو أخذت الشرعية الزائفة فإن الرسول صلى الله عليه وآله ممثلاً بسبطه الإمام الحسين عليه السلام غير راضٍ عنها.
هكذا كانت نعمة عاشوراء علينا وعلى الإسلام في كل مذاهبه وأطيافه، وخاصة على المجاهدين اليوم في المقاومة فهم تيقنوا أن العدد والعتاد لا يهم إن كان المرء مؤمناً بربه وأن الطريق الذي يسير فيه يرضى الله تعالى ويرضي رسوله(ص) وآل بيته الأطهار وأنه ولو مات ودمر بيته وحرقت أرضه فإنه يحيي بموته هذا الأمة ويوقظها وينبهها بأن الأمر كبير جداً جداً وأن الخطر المحدق قد أصبح قاب قوسين أو أدنى. وإن الحزن على الحسين وأصحابه في كل سنة ما هو إلا جزء ضئيل جداً جداً من مدرسة عاشوراء الحسين المتكاملة التي أغنت العالم بتجربتها العظيمة.
فحمداً لله تعالى على نعمته العظمى والكبرى نعمة عاشوراء ونعمة البكاء على الحسين فكل دمعة كان يذرفها شهيد من شهداء المقاومة الإسلامية على إمامه في عاشوراء كانت تزيد عقيدته وإيمانه قوة وصلابة بأن الموت في سبيل الله حياة للروح والأمة والإسلام، وفداء لرسول الله صلى الله عليه وآله وسلم وآل بيته الأطهار عليهم أفضل الصلاة والسلام.والحمدلله رب العالمين.